靚仔醫生俏病人

二月十四，甜姑特別擇此日到診所驗血取藥，為鄭醫生獻上血的禮物。而我，就乘機湊熱鬧，兼送上薄禮答謝醫生。


這位就是靚仔鄭楚豪醫生了。相中的診症室像是很寬敞，這是拜 CANON機的wide angle所賜，房內貼滿一牆家庭照，還有小朋友的勞作，靚仔、仁心、仁術、愛家，點解有咁好的男人！！！

甜姑的病，不便由我說啦。（但都透露少少﹣﹣﹣佢要減肥囉，哈哈！！！）

鄭醫生，每次都係咁關心各人，問候我之餘，還有問李雲迪近況。佢真係一個好醫生0黎0架。

原來，當初他向我宣布我的病情時，為免我過份憂慮，他當時只以「有瘤腫，有擴散跡象」的婉轉詞彙來形容我的病情，沒有直接向我講我有cancer，怕我接受不來。（我當時都感覺到他好像不知要如何向我報告病情。）不過，我的過份冷靜讓這位醫生很不自在。佢覺得，病人應該會即時好shock，然後會追問醫生如何如何。佢話：「站在醫生立場，好難接受到個病人咁calm。」其實，當時我係未識驚，又未來得及驚0者。

翻發......甜姑的病可能會，李雲迪的病又可能會，但我的病就嚴重得多。「條路係崎嶇，但最緊要有得搞。」這是鄭醫生給我的勸勉。多謝你呀醫生。

由我們三人的病，談到醫生的兩位讀國際學校的小朋友，玩完一輪，離開醫生房，出面成村人等睇症，而我地就0係房度又傾偈又影相，間中還爆出大笑聲，希望冇畀人詛咒啦。

--------------------------------------------------------------------

回家，黑暗的路旁有物體在移動，原來是蟾蜍！這兩晚，都聽到牠們在叫，春節交配期又來了！！希望你們找到適合的另一半，努力繁衍下一代，幫我地食晒d蟑螂蚊蟲。