被嫌棄的朱古力

今日返診所拆線，之前，去ifc的Leonidas買了兩盒朱古力畀周姑娘及丹尼鄭。周姑娘識貨，知道呢隻朱古力好滑。嘿，丹尼鄭，我以後唔買朱古力畀你呀。Why？事因佢收到後，話：「你都好鍾意食朱古力喎。」「係呀。」「小心d呀，朱古力好肥。」「呢隻係冇附加糖0架。」「冇糖0者，有cream，好多cream0架。」死0野∼∼∼∼早知唔0徒錢買畀你啦，好Q貴0架。

討論完朱古力，入正題。分point講，冇咁煩：

．小妹的初步療程經已完成，在未來的兩年，都要keep住每兩個月回診所抽血檢驗。下次將會是四月。我怕我做完化療變得癡呆，到時大家可否提一提我。
．藥打入肚，與打進血管，基本上效果一樣，這是最新研究報告喎。丹尼鄭見我有點擔心，竟然仲寸我喎，「一唔係，我而家幫你0係肚度開刀，放番個盒入去，再打藥囉。」.............人地都係擔心問下0者，使唔使咁講0野。
．輔助性質的12針carboplatin，丹尼鄭冇堅持要我打。佢話，根據最新研究，打那12針，不能根治癌症，但可以延遲復發的情況；而在未復發及復發後才打，基本上係冇分別。當CA-125指數出現三位數字時再打都得。點解唔係超過35？因為指數在100以下，也scan不到腫瘤喎，貿貿然打，唔抵。
．覆診期間，若然發現有甚麼不妥，例如肚脹，就要即刻去睇佢。
．基本上手術半年後就可以做劇烈運動，佢話瑜伽唔算劇烈喎，但我話：「但拉扯得勁嘛。」丹尼鄭：「如果你聽到卜一聲，就call我，我幫你聯番。」＠＿＠；但，佢又話，高溫瑜伽對心臟有危險，即使係平常人。
．Estrogen hormone，要天天搽，佢話：「咁後生，唔好咁快變0左個婆仔咁。」不怕引發乳癌嗎？不會喎，因為我連子宮都切0左，不會誘發乳癌喎。「咁係咪搽0左就冇骨質疏鬆？」「少0的機會啦。」
．復發率，香港與外國的數字一樣。丹尼鄭話，有些病人好幾年都冇事，但最近有一個一年後便復發了。

佢提我，叫我唔好忘記我的擴散範圍好大喎。咁點呢？你都幫唔到我乜0架啦。唯有靠自己行氣功啦，我唔想再打化療針，而家又已經沒有借口偷懶了，明天開始要努力啊。

---------------------------------
後記：周姑娘與丹尼鄭是無敵拍擋

話說，我攤0左0係床，丹尼鄭望完傷口，話傷口好靚，然後講：「拆線，睇，貼膠布。」
嘩，丹尼鄭，你係咪羅家英唐三藏上身，講得咁簡潔！
周姑娘見我一臉疑惑，就解釋：「拆線之後，畀佢睇下個傷口，然後就可以貼膠布。」
跟官咁耐，真係會心領神會。