我係咁0架喇，吹咩！

滿心期待，讓阿牛幫我打爆Biohazard。山長水又遠的，抬機抬火牛入愉景灣，點知，入到去，開唔到部Wii。

其實由昨晚開始，我望住部機，就有點不祥之兆，會唔會部機燒鬼0左呢？！（因為我將部DVD機的兩腳插頭插在一個拖板上，姨甥仔第一：可能會以為自己好醒，搵到個近d0既位插部Wii，唔使拖個電掣去火牛度；第二，條友懶，怕麻煩，就直接將部Wii插在電視旁的拖板上的兩腳插蘇轉換器。

唔信邪，冇在出發前試機，點知，真係畀我估中0左。

終於，四條友在愉景灣走來走去，上上落落，最後都係冇機打，搞到一身汗，又曬黑埋。

晚上去黃金試機，睇下邊度壞，發現係火牛燒了，用180買番。猛然醒起，電視機旁的拖板在上星期突然燒Fuse，當時不以為然，這時才將Wii燒火牛的事件拉上關係，已有十足把握回家大興問罪之師。

但，熟知條友仔性格，直接問，佢一定唔會認，唯有先發問一些常識問題，以香港用電電壓的話題開始問佢，叫他一步一步踏入陷阱。

嘿，後來條友仔承認知道拖板燒了，但不知Wii的火牛燒0左啦。

頂佢個肺，如果佢唔係一個理科生，如果佢唔係鍾意打機，我都冇咁嬲。考會考喇今年，仲要考Physics0架，咁簡單常識都唔識！話佢一句：原來你讀書係不求甚解0既！佢駁一句：係呀，我死背0架乍！都唔知佢點解0既！∼∼∼∼∼∼∼∼哇！真係想兜巴車埋去。而家好似佢讀書係被迫咁，佢係受迫害一族，我唔想讀0架，即使叫我讀，我都係唔識0架喇！爭在未講出口的是：你吹咩！

重點，其實唔係想鬧佢發洩，係想佢知道，學習，是用來生活的。好彩拖板有Fuse0者，唔係一插即爆即燒死你啦。咁簡單的常識都唔曉，平日仲要覺得自己好叻咁，問多兩句嫌你嘈，嫌你煩，覺得自己阿娘冇學識，講野完全唔需要尊重，唉，可能要到進入社會大學，這隻井底蛙才會成長。