"Life is one fuckin' beauty contest after another"

小Ken數月前極力推蔫大家睇《陽光小小姐》，可惜冇乜戲院上呢套好戲，唯有買DVD看。多謝老馬送贈。

當生活遇上不如意事，衰到貼地時，真的需要哭喪著臉嗎？戲中一家人，各有各的生活問題，但導演以黑色幽默的手法拍攝，讓人看得又笑又喊。最尾一幕，是感動位，是高潮位，令我的眼淚也不能自控地流下。

詳細劇情不多說了，免影響你們欣賞這套戲的心情，如果你也曾在生活中受過傷，都應該去看這套戲。

戲中那部黃色VW巴士，是我的最愛，它比喻戲中那甩頭甩骨的家庭。雖然車是破爛，但只要靠著大家的愛，合眾人之力，它也能起動，甚至能將乘客帶到目標地。

論熱血，其實日劇可能仲激。不過那現實感，戲中多句精警對白，都教人難忘。
"A real loser is someone who's so afraid of not winning he doesn't even try."
"What is your daughter doing?" "She's kickin' ass...that's what she's doing;"


“生活最爛透的時候，就是你得著得最多的時候。”
受創又如何，只要勇敢面對，盡過力，我們都不是loser。

突然失落

今日再過中環睇傷口。本來周姑娘叫我十點九去到，鄭醫生一返診所就可以睇我，唔使我等，但我出門前搞呢搞路，終於遲了成半個鐘才去到。例牌的，一群人在等睇鄭醫生，我當然要等下啦。

其實我都幾enjoy在診所等的時間，可以揭我唔會買的雜誌，Orange Page啦、Forbes啦；又可以偷聽別人討論病情。今日有位後生靚太加入了癌患行列，她的緊張，於踫到朋友後表露無遺，不停的問不停的問。反而我每次見到醫生，都唔係好知要問乜，問我會唔會好番？問癌細胞死晒未？醫生答唔到0架喎。咁唔問呢0的，仲有乜好問呢可？

今日揭開紗布睇，傷口冇再流血，亦冇紅腫，好似復原得幾好，可能抗生素起到作用掛。明天不用到診所了，等下星期一再去拆線。連去幾日，一下子停下來，有點失落添。

離開診所，今天不闖銅記，轉飛佐敦，先去一間病友介紹的生機排毒小餐館食午飯。小餐館以排毒食物飲品作招徠，供應五穀飯、牛蒡茶、果汁、經唔知乜0野過濾過的水等等。我叫了個豬扒五穀飯，五穀飯內的杞子、黑糯米、紅棗是我的食物禁忌，噢，只有盡量揀出來吧。作為正常人，其實這些食品也不錯，大家出佐敦不仿一試，餐廳名為「以諾」，在德成街，即恆豐中心後。

吃過午飯，到石齋買石、毛筆、雕刻刀、揮春紙等等。本來以為回到家中會大筆豪揮，怎料精神萎靡，在梳化睡了個多小時，醒來後心情也不太像樣。可能是站在彌敦道等車等久了，吸入太多廢氣；可能知道明天不用到診所，冇得八掛，有點失落吧......

重獲自由的快樂

因著腳痛之故，被困深水佬兩三個月，那種hopeless感覺好苦。

星期日春分過後，一切像是寒冬回春的景像。首先，星期日行了粒幾鐘氣功；昨天，可以獨自去到銅記；今天，12點幾離開中環診所，搭叮叮再闖銅記，食和民鮭魚吞拿魚腩飯，落FrancFranc，行Ice Fire，搵保險，行City'super，行到四點幾，搭地鐵回家。我由一點九行到五點三回到家中，勁嘛？

現在的我，容易滿足到暈，可以獨自行街，行到超過十分鐘而冇腳痛，已經好感激上天。一路行一路行，滿足的笑容掛在臉上，有點傻......

豬年有美好的開始，是上天給我的祝福。好希望我可以好好把握，活好每一天。

抗生人

今早起床後，傷口繼續淌血，而且滲出那三條我胡亂貼在傷口面的膠布，只有用紙巾抹掉。

到診所，丹尼鄭原來全日開會，不在。
周姑娘幫我洗傷口，佢call丹尼鄭，回覆後，話我要食五日抗生素zinnat，傷口用雙氧水抹，明早再去睇傷口喎。

在診所遇到堅道阿太，嗲了一個鐘。搭地車出老銅，離不開在書屋狂買書，食午飯。書屋入了很多《太陽之歌》的書，包括漫畫、琴譜、結他譜；另外是一系列《風林山火／火山？》的漫畫及文字書，獨欠のだめ的漫畫、失望......

快要過年了，順道落B2買日式和果子做賀禮。源吉兆庵出了一款有達魔及舞獅和果子禮盒裝，靚多於一切，買下來，有緣就可以送禮給大圍靚仔鄭醫生。

搭地鐵回家，在中環站與香港站之間的大堂，放了Hello Mimi的情人節setting，撇除我不喜愛這character的因素，都覺得這個結婚setting做得幾靚，勁多人影相呀。

有一個成人咁高的Hello MiMi與Dear Daniel，都幾壯觀0架。



圍邊放的花球，都有Hello Mimi樣，幾得意丫。

氣沖瘀血

星期日，很醒！竟然可以行到超過一個鐘氣功，腳痛程度都是維持在可容忍度。回家後還可若無其是的沖茶、叮蘿蔔糕食添。

可惜，一切活動，在八時後就中止了......在梳化睡了十多分鐘，醒來，肚子傷口痕痕癢癢的，一望之下，哇~~~~~竟然滲血！！白色的紗布變成鮮紅色。唯有即call丹尼鄭，佢話可能係瘀血，叫我不要撕開那片膠布，只需在上面加紗布，再貼膠布，用壓力按著止血就可，晚上就只可睇下電視食飯算喇，乜都唔好做，明早再去診所畀佢睇下。哈，原來屋企係冇紗布的，只有膠布型的紗布，是但求其貼下啦。

食過飯後，血繼續滲，還漏出了最原先那片膠布添，而家是深夜十二點幾，血仍未止，噓，應該冇事掛......

氣功真的那麼勁，可以將體內瘀血迫出？哇，原來真係咪立亂發功。（明早見到丹尼鄭，死口都唔認自己做過運動先，唔係盞捱罵。）

繼續「我慢」

身體正在重整中。眉毛開始發芽，手嘛，在用暖水洗面、扭毛巾後，沒有麻痺痕癢感，可是腳掌仍有待康復。

已經有兩個月沒有到過銅記了。昨天，上完日文課，坐914到銅記J Sound 25唱K，六點，由登龍街步行自Times Square和民飯堂，和民轉了新餐牌，少了選擇，我經常吃的茶漬飯沒了，豆乳特飲沒了.\/.。七點半，埋單，到流浪貓買份小禮物畀譚醫師，然後到銅中搵日劇，噢，腳開始刺痛了。再勇闖Sogo書屋.......嘩，走了很多路哩。去Sogo目的，其實是想坐下抖抖，才再搭地鐵起程回家。

距1月2日最後兩支針到現在，都只是一個月，細胞回復不算快，沒辦法啦，年紀大嘛。唯有繼續「我慢」。

今天要再入八鄉行氣功，希望行到超過半個鐘啦，又希望對痛腳唔會等到睡覺後才回復過來啦。嗚嗚> o <``''*~~~~~~佟師兄，我唔係想偷懶0架~~~~~~

「有人會為了輸而參加比賽的嗎？」

題目的對白，來自日劇《交響情人夢》中，女主角一鼓作氣，在被不睇好的情況下參加鋼琴公開比賽。當她面對鋼琴老師時，她所作出的回應。

現實中，梁家傑就是要參加一場注定會輸的比賽。

看六點亞視新聞，看曾特首宣布參選的一場show，已經有點皺眉；再看六點半無線新聞，突然有點作嘔感覺，唔係講笑，真係気持ちが悪い.佢真係當香港人係乞兒麼？派少少錢，香港人就會滿足麼？你派＄１畀我地，到頭來，還不是要我們從腰包裡拿一百塊給大財閥？

有些白痴評論，話梁家傑無行政經驗，一個律師，根本唔識管現咁大個政府。頂你班契弟（見諒，我實在太激動）！所有人都知道，呢場比賽，梁氏根本無勝算，所以根本不用討論梁氏適不適合做特首，又或者，佢做了特首後會點。梁氏參選，係為了凸顯選舉制度的不公、煲0太的不濟、有錢佬如何控制香港。

請大家支持一下這位loser，到袋巾背後的blog留個言，支持下。不過好奇怪，我留的言竟然失了蹤，不知是否被delete了？？？